Hvussu hevur tú tað?

Stóra fólkaheilsukanningin hjá Fólkaheilsustýrinum, ”Hvussu hevur tú tað?”, var opin at svara frá sept.-nov. 2023. Talan er um eina spurnakanning um heilsu, trivnað og lívsstíl. Málið er at fáa til vega vitan og gera hagfrøðisligar greiningar, sum kunnu brúkast til at bøta um fólkaheilsuna í Føroyum. Kanningin útvegar upplýsingar um heilsustøðuna hjá føroyingum kring landið, sum heilsuverk og myndugleikar kunnu brúka sum grundarlag fyri at leggja til rættis og raðfesta átøk á heilsuøkinum.

8.000 tilvildarliga valdir føroyingar fingu innbjóðing sendandi um at luttaka í kanningini. Sjálv kanningin fór fram á Vanganum, har luttakarar svaraðu spurningum um einamest heilsu, lívsstíl og trivnað. Luttøkan er navnloynd, tvs. at til ber ikki at teingja svarini saman við einstøkum luttakarum.

Afturvendandi kanning
Hetta var triðju ferð, at spurt verður, hvussu føroyingar hava tað. Sama kanning varð gjørd í 2015 og í 2019, og tí ber til at gera samanberingar og meta um eina møguliga gongd, eins og úrslitini kunnu samanberast við líknandi kanningar í grannalondum okkara.

Breið umboðan
Umráðandi er at fáa øll øki í landinum við fyri at fáa eina rætta mynd av heilsustøðuni kring allar Føroyar. Liviumstøður, tørvur o.a. eru ymisk, alt eftir hvar tú býrt, tí er eisini hugsandi, at fólk svara ymiskt kring landið. Neyðugt er tí, at øll øki í landinum verða javnt umboðað í kanningini, bæði fyri at geva eina rætta heildarmynd, men eisini fyri at kunna seta inn við møguligum heilsuátøkum alt eftir tørvi í lokaløkjunum. Eingi kanningarúrslit verða gjørd upp fyri einstakar bygdir ella kommunur, men heldur fyri øki í landinum. Hetta verður gjørt fyri at tryggja anonymitetin hjá luttakarunum.