logo
Útgivið 24. november 2023

Átøk í ABC vikuni skapt nýggjar felagsskapir


Í gjár savnaði Fólkaheilsustýrið samstarvsfelagar í ABC fyri sálarliga heilsu til felags fund fyri seinasti ferð í ár. Hesaferð legði Tórshavnar kommuna høli til fundin í Perluni.

Høvuðsevnið á degnum var at umrøða ABC vikuna, ið var í oktober og sum hevði eina skrá, ið fevndi um heili 50 ABC tiltøk. ABC samstarvsfelagar stóðu fyri tiltøkunum, og fleiri av teimum hava havt góð úrslit við sær, ið hava skapt nýggjar felagsskapir millum borgarar.

Leggja lunnar undir áhaldandi virksemi

Tey 50 tiltøkini, ið vóru í ABC skránni til ABC vikuna vóru fyri børn, ung, vaksin og eldri og vóru um alt landið. Á samstarvsfundinum løgdu Maud Egholm úr Hvalbiar kommunu og Anja Hammer og Morid Meitilberg úr Gigni fram um, hvussu teirra átøk høvdu eydnast.

Hvalbiar kommuna hevur verið partur av ABC fyri sálarliga heilsu í trý ár, og gjøgnum ABC vikuna merktu tey, at bygdarfólkið hevur tikið átakið til sín. Hvalbiar kommuna skipaði fyri tiltøkum hvønn dag í eina viku. Borgararnir hava glett seg til tiltøkini, og kommunan hevur fingið nógvar jaligar afturboðanir. Kommunan skipaði millum annað fyri “bindiklubba treff” og “harratreff” fyri allar aldursbólkar í kommununi, og hesi vóru somikið væleydnað, at bindiklubbatreff verður afturvendandi hvønn mánað, og tað sama verður møguliga eisini galdandi fyri harratreff.

Gigni legði dent á pápar og smábørn í ABC vikuni við átakinum “Babbasa spælistova”, ið var ein spælistova fyri pápar við børnum undir skúlaaldur. Spælistovurnar vóru fimm støð kring landið, og millum 15 og 50 pápar møttu saman við børnum á hvørjum staði. Her vóru afturboðanirnar eisini góðar, og nakrir pápar gjørdu vart við, at teir høvdu saknað slík tilboð. Átakið hevur havt við sær, at fleiri nýggir felagsskapir eru stovnaðir á sosialum miðlum millum pápar, ið luttóku. Babbasa spælistova hevur verið afturvendandi summastaðni, og strembað verður eftir, at hetta verður møguligt fleiri av hinum støðunum eisini.

Happing millum fólkaskúlanæmingar vísir skeiva gongd

ABC samstarvsfundirnir innihalda javnan faklig upplegg, og hesaferð vóru tað Annika Helgadóttir Davidsen og Layfey H. Blaasvær, ið løgdu fram úrslit úr trivnaðarkanningini 2023 í føroyska fólkaskúlanum. Hóast gongdin við happing hevur verið minkandi frá 2007-2019, so vísir kanningin í ár, at støðan er nógv versnað síðan 2019, tá 11% søgdu seg vera blivin happað í skúlanum. Í ár siga 17%  seg vera fyri happing,  og mátin, happing fer fram upp á, broytist og er eisini á fleiri pallum, t.d. sosialum miðlum. Slík úrslit eru sera viðkomandi fyri flestu ABC samstarvsfelagar, sum á ymiskan hátt vilja fremja sálarligu heilsuna hjá børnum og ungum kring landið.

Kom við í ABC samstarvið

Um tín kommuna, felag ella stovnur hevur hug til at gerast partur av ABC fyri sálarliga heilsu, so ber til at hoyra nærri við at venda sær til Fólkaheilsustýrið við telduposti til: Monika@fhst.fo.

Mynd: Fólkaheilsustýrið. Luttakarar á myndini umboða Eiðis kommunu, Javna, Almannaverkið, SSP, Gigni, Vága kommunu, Tórshavnar kommunu, Psykiatriska depilin, Sunda kommunu, Psykoterapeut Felag Føroya, Fysioterapeutfelagið og Fólkaheilsustýrið. Umboð fyri Bláa Kross, Húsarhaldsskúla Føroya, Reyða Kross, Hvalbiar Kommunu og Tvøroyrar kommunu luttóku eisini, men vanta á myndini.

Onnur kunning

  1. Útgivið 22. mai 2024
    Leiðreglur fyri reingerð
  2. Útgivið 14. mai 2024
    ES-kommisjónin viðurkennir ABC fyri sálarliga heilsu
  3. Útgivið 14. mai 2024
    Starvslesandi til Fólkaheilsustýrið
  4. Útgivið 30. apr. 2024
    Vestmanna kommuna samstarvsfelagi í ABC
  5. Útgivið 22. apr. 2024
    Tíðindaskriv: Vit viga ov nógv
  6. Útgivið 17. apr. 2024
    Gransking krevur samtykki
  7. Útgivið 16. apr. 2024
    Fólkaheilsufrøðingur til Fólkaheilsustýrið
  8. Útgivið 21. mar. 2024
    Føroyingar roykja nógv meira enn aðrir norðurlendingar
  9. Útgivið 19. mar. 2024
    Løgfrøðingur til Fólkaheilsustýrið
  10. Útgivið 08. mar. 2024
    Samstarvsavtala við Genomisk Medisin á Ríkissjúkrahúsinum
  11. Útgivið 01. mar. 2024
    ABC samstarvsfundur og nýggjur samstarvsfelagi
  12. Útgivið 22. feb. 2024
    FarGen miðvísari til verka
  13. Útgivið 09. feb. 2024
    Stovnarin av ABC fyri sálarliga heilsu vitjar í Føroyum
  14. Útgivið 01. feb. 2024
    PKU-kortini hjá føroyingum flyta til Føroya
  15. Útgivið 29. jan. 2024
    Vend í tølunum fyri umfarssjúkur
  16. Útgivið 23. jan. 2024
    Kanningartilboð av nýføðingum víðkað til 25 sjúkur
  17. Útgivið 10. jan. 2024
    Visit Faroe Islands Meetings skrivað grein um ABC
  18. Útgivið 05. jan. 2024
    Móttøka í Fólkaheilsustýrinum
  19. Útgivið 02. jan. 2024
    Tíðindaskriv: Farsóttarøkið á føroyskar hendur
  20. Útgivið 28. des. 2023
    Ver virkin í 31 dagar