Framløga um sálarheilsu hjá ungum í Føroyum
150 fólk vóru til ráðstevnuna á Setrinum í gjár, sum snúði seg um sálarheilsuna hjá ungdómi. - Vit skulu avrika og renna skjótari og skjótari, segði Djóni Nolsøe Joensen, landsstýrismaður, m.a. í setanarrøðu sínari.
Ráðstevnan hevði heitið "Hvat bagir?" og setti sjóneykuna á tað, sum kann ávirka sálarligu heilsustøðuna hjá ungdóminum. Sambært fleiri granskarum er sálarligi trivnaðurin hjá ungum í støðugari afturgongd, hóast ungdómurin í dag søguliga neyvan hevur havt betri fortreytir fyri at støðast í lívinum.
Men hvat er tað, sum bagir?, varð so spurt á ráðstevnuni í dag, har Ole Jacob Madsen, sálarfrøðingur, heimspekingur og professari, Hermundur Sigmundsson, sálarfrøðingur og professari, Annika Helgadóttir Davidsen, sálarfrøðingur, og Monika Mohr, kandidatur í sálarfrøði og heilsufremjan høvdu framløgu.
Í 2021 fóru Annika og Monika undir eina kvalitativa kanning fyri Fólkaheilsuráðið (ið nú er partur av Fólkaheilsustýrinum) um sálarligu heilsuna hjá ungum í Føroyum. Endamálið við kanningini var at fáa innlit í, hví tað serliga eru tey ungu millum 18-34 ár í Føroyum, ið meta sína sálarligu heilsu vera ringast og hvørji viðurskifti hava neiliga ávirkan á sálarligu heilsuna hjá teimum ungu. Trý høvuðsúrslit, sum vóru - ov nógvir valmøguleikar, høgar væntanir og avmarkingar í einum lítlum samfelag - blivu løgd fram á ráðstevnuni.
Kelda: setur.fo
